35.श्री पुष्पदंत जी जिन पूजा

पुष्पदन्त भगवन्त सन्त सु जपंत तंत गुन|
महिमावन्त महन्त कन्त शिवतिय रमन्त मुन||
काकन्दीपुर जन्म पिता सुग्रीव रमा सुत |
श्वेत वरन मनहरन तुम्हैं थापौं त्रिवार नुत ||

ॐह्रीं श्रीपुष्पदन्त जिनेन्द्र!अत्र अवतर अवतर संवौषट्|

ॐह्रीं श्रीपुष्पदन्त जिनेन्द्र!अत्र तिष्ठ तिष्ठ ठः ठः|

ॐह्रीं श्रीपुष्पदन्त जिनेन्द्र!अत्र मम सन्निहितो भव भव वषट् |

 हिमवन गिरिगत गंगाजल भर,कंचन भृंग भराय|
करम कलंक निवारनकारन,जजौं, तुम्हारे पाय||
मेरी अरज सुनीजे, पुष्पदन्त जिनराय, मेरी अरज सुनीजे ||

ॐ ह्रीं श्रीपुष्पदन्त जिनेन्द्राय जन्मजरामृत्युविनाशनाय जलं नि0स्वाहा |1|

बावन चन्दन कदलीनंदन,कुंकुम संग घसाय|
चरचौं चरन हरन मिथ्यातम,वीतराग गुण गाय||
मेरी अरज सुनीजे, पुष्पदन्त जिनराय,.....

ॐ ह्रीं श्रीपुष्पदन्त जिनेन्द्राय भवातापविनाशनाय चन्दनं नि0स्वाहा |2| 

शालि अखंडित सौरभमंडित,शशिसम द्युति दमकाय |
ता को पुञ्ज धरौं चरननढिग,देहु अखय पद राय||
मेरी अरज सुनीजे, पुष्पदन्त जिनराय,.....

ॐ ह्रीं श्रीपुष्पदन्त जिनेन्द्राय अक्षयपदप्राप्तये अक्षतान् नि0स्वाहा |3|

सुमन सुमनसम परिमलमंडित,गुंजत अलिगन आय|
ब्रह्म-पुत्र मद भंजन कारन,जजौं तुम्हारे पाय||
मेरी अरज सुनीजे, पुष्पदन्त जिनराय,.....

ॐ ह्रीं श्रीपुष्पदन्त जिनेन्द्राय कामबाणविध्वंसनाय पुष्पं नि0स्वाहा |4| 

घेवर बावर फेनी गोंजा, मोदन मोदक लाय |
छुधा वेदनि रोग हरन कों, भेंट धरौं गुण गाय ||
मेरी अरज सुनीजे, पुष्पदन्त जिनराय,.....

ॐ ह्रीं श्रीपुष्पदन्त जिनेन्द्राय क्षुधारोगविनाशनाय नेवैद्यं नि0स्वाहा |5|

वाति कपूर दीप कंचनमय,उज्ज्वल ज्योति जगाय|
तिमिर मोह नाशक तुमको लखि,धरौं निकट उमगाय||
मेरी अरज सुनीजे, पुष्पदन्त जिनराय,.....

ॐ ह्रीं श्रीपुष्पदन्त जिनेन्द्राय मोहान्धकार विनाशनाय दीपं नि0स्वाहा |6|

दशवर गंध धनंजय के संग, खेवत हौं गुन गाय |
अष्टकर्म ये दुष्ट जरें सो, धूम सु धूम उड़ाय||
मेरी अरज सुनीजे, पुष्पदन्त जिनराय,.....

ॐ ह्रीं श्रीपुष्पदन्त जिनेन्द्राय अष्टकर्मदहनाय धूपं नि0स्वाहा |7|

श्रीफल मातुलिंग शुचि चिरभट,दाड़िम आम मंगाय|
ता सों तुम पद पद्म जजत हौं,विघन सघन मिट जाय||
मेरी अरज सुनीजे, पुष्पदन्त जिनराय,.....

ॐ ह्रीं श्रीपुष्पदन्त जिनेन्द्राय मोक्षफल प्राप्तये फलं नि0स्वाहा |8| 

जल फल सकल मिलाय मनोहर,मनवचतन हुलसाय|
तुम पद पूजौं प्रीति लाय के, जय जय त्रिभुवनराय||
मेरी अरज सुनीजे, पुष्पदन्त जिनराय, मेरी ...

ॐ ह्रीं श्रीपुष्पदन्त जिनेन्द्राय अनर्घ्यपदप्राप्तये अर्घ्यं नि0स्वाहा |9|

पंच कल्याणक अर्घ्यावली
नवमी तिथि कारी फागुन धारी, 
गरभ मांहिं थिति देवा जी |
तजि आरण थानं कृपानिधानं, 
करत शची तित सेवा जी ||

रतनन की धारा परम उदारा, 
परी व्योम तें सारा जी |
मैं पूजौं ध्यावौं भगति बढ़ावौं, 
करो मोहि भव पारा जी ||

ॐ ह्रीं फाल्गुनकृष्णानवम्यां गर्भमंगलप्राप्ताय श्रीपुष्पदन्त जिनेन्द्राय अर्घ्यं नि0 |1|

मंगसिर सितपच्छं परिवा स्वच्छं, 
जनमे तीरथनाथा जी |
तब ही चवभेवा निरजर येवा, 
आय नये निज माथा जी ||

सुरगिर नहवाये, मंगल गाये, 
पूजे प्रीति लगाई जी |
मैं पूजौं ध्यावौं भगत बढ़ावौं, 
निजनिधि हेतु सहाई जी ||

ॐ ह्रीं मार्गशीर्षशुक्ला प्रतिपदायां जन्ममंगलप्राप्ताय श्रीपुष्प0   अर्घ्यं नि0 |2|

सित मंगसिर मासा तिथि सुखरासा, 
एकम के दिन धारा जी |
तप आतमज्ञानी आकुलहानी, 
मौन सहित अविकारा जी ||

सुरमित्र सुदानी के घर आनी, 
गो-पय पारन कीना जी |
तिन को मैं वन्दौं पाप निकंदौं, 
जो समता रस भीना जी ||

ॐ ह्रीं मार्गशीर्षशुक्ला प्रतिपदायां तपोमंगलप्राप्ताय श्रीपुष्प0 अर्घ्यं नि0 |3|

सित कार्तिक गाये दोइज घाये, 
घातिकरम परचंडा जी |
केवल परकाशे भ्रम तम नाशे, 
सकल सार सुख मंडा जी ||

गनराज अठासी आनंदभासी, 
समवसरण वृषदाता जी |
हरि पूजन आयो शीश नमायो, 
हम पूजें जगत्राता जी ||

ॐ ह्रीं कार्तिकशुक्ला द्वितीयायां ज्ञानमंगलप्राप्ताय श्रीपुष्प0 अर्घ्यं नि0 |4|

भादव सित सारा आठैं धारा, 
गिरिसमेद निरवाना जी |
गुन अष्ट प्रकारा अनुपम धारा, 
जय जय कृपा निधाना जी ||

तित इन्द्र सु आयौ, पूज रचायौ,
चिह्न तहां करि दीना जी |
मैं पूजत हौं गुन ध्यान मणी सों, 
तुमरे रस में भीना जी ||

ॐ ह्री भाद्रपद शुक्लाऽष्टम्यां मोक्षमंगलप्राप्ताय श्रीपुष्प0 अर्घ्यं नि0 |5|

  जयमाला
दोहाः- 
लच्छन मगर सुश्वेत तन 
तुड्गं धनुष शत एक |
सुरनर वंदित मुकतिपति, 
नमौं तुम्हें शिर टेक |1

पुहुपदन्त गुनवदन है,
सागर तोय समान|
क्यों करि कर-अंजुलिनि कर,
करिये तासु प्रमान|2

पुष्पदन्त जयवन्त नमस्ते,
पुण्य तीर्थंकर सन्त नमस्ते|
ज्ञान ध्यान अमलान नमस्ते,
चिद्विलास सुख ज्ञान नमस्ते|3

भवभयभंजन देव नमस्ते,
मुनिगणकृत पद-सेव नमस्ते|
मिथ्या-निशि दिन-इन्द्र नमस्ते,
ज्ञानपयोदधि चन्द्र नमस्ते |4

भवदुःख तरु निःकन्द नमस्ते, 
राग दोष मद हनन नमस्ते |
विश्वेश्वर गुनभूर नमस्ते, 
धर्म सुधारस पूर नमस्ते |5|

केवल ब्रह्म प्रकाश नमस्ते, 
सकल चराचरभास नमस्ते |
विघ्नमहीधर विज्जु नमस्ते, 
जय ऊरधगति रिज्जु नमस्ते |6|

जय मकराकृत पाद नमस्ते, 
मकरध्वज-मदवाद नमस्ते |
कर्मभर्म परिहार नमस्ते, 
जय जय अधम-उद्धार नमस्ते |7|

दयाधुरंधर धीर नमस्ते, 
जय जय गुन गम्भीर नमस्ते |
मुक्ति रमनि पति वीर नमस्ते, 
हर्ता भवभय पीर नमस्ते |8|

व्यय उत्पति थितिधार नमस्ते, 
निजअधार अविकार नमस्ते |

भव्य भवोदधितार नमस्ते, 
वृन्दावन निस्तार नमस्ते |9|

घत्ताः- जय जय जिनदेवं हरिकृतसेवं, 
परम धरमधन धारी जी |
मैं पूजौं ध्यावौं गुनगन गावौं, 
मेटो विथा हमारी जी |10|

ॐ ह्रीं श्रीपुष्पदन्तजिनेन्द्राय पूर्णार्घ्यं निर्वपामीति स्वाहा |
 
छन्दः-पुहुपदंत पद सन्त,जजें जो मनवचकाई |
नाचें गावें भगति करें, शुभ परनति लाई ||
सो पावें सुख सर्व, इन्द्र अहिमिंद तनों वर |
अनुक्रम तें निरवान, लहें निहचै प्रमोद धर ||
 इत्याशीर्वादः (पुष्पांजलिं क्षिपेत्)